Ҳисобот оид ба фоида ва зарарҳо Ҳисобот оид ба фоида ва зарарҳо яке аз шаклҳои ҳисоботи муҳосибӣ мебошад, ки натиҷаҳои молиявии фаъолияти корхона ё ташкилотро дар давраи ҳисоботӣ нишон медиҳад ва маълумот дар бораи даромад, хароҷот ва натиҷаҳои молиявиро бо ҷамъи афзоянда аз оғози сол то санаи ҳисоботӣ дар бар мегирад.

Дар ин шакл андозаи фоида ё зарари тавозунӣ ва унсурҳои алоҳидаи ин нишондиҳанда инъикос карда мешаванд:

• фоида/зарарҳо аз фурӯши маҳсулот;
• даромадҳо ва хароҷоти амалиётӣ (фарқи мусбат ва манфии қурбӣ);
• даромад ва хароҷот аз фаъолияти дигари берун аз фурӯш (ҷаримаҳо, қарзҳои беилоҷ);

Инчунин:

• хароҷоти корхона барои истеҳсоли моли фурӯхташуда бо арзиши пурра ё истеҳсолӣ,
• хароҷоти тиҷоратӣ, хароҷоти идорӣ,
• пули софи (нетто) фурӯши маҳсулот,
• маблағи андоз аз фоида, уҳдадориҳои ба таъхир афтодаи андоз ва уҳдадориҳои доимии андоз,
• фоидаи соф.

Ҳангоми таҳияи ҳисобот пули фурӯш ва даромадҳои дигар, инчунин хароҷот бо усули пардохт ҳисоб карда мешаванд, яъне вақте ки истеъмолгарон уҳдадори пардохтани нархи маҳсулот ё хизматрасонии корхона мегарданд. Бештар аз ҳама чунин ҳолат дар замони ба истеъмолгар равон кардани маҳсулот ё расонидани хизмат рӯй медиҳад ва зимни он харидор (фармоишгар) ҳуҷҷатҳои дахлдори ҳисобиро пешниҳод менамояд.

Ҳисобот оид ба фоида ва зарар барои таҳлили нишондиҳандаҳои фоидаоварии корхона, фоидаоварии маҳсулоти фурӯхташуда, фоидаоварии истеҳсоли маҳсулот, инчунин барои муайян намудани ҳаҷми фоидаи соф манбаи муҳимтарин ба шумор меравад.

Ҳисобот оид ба тағйирёбии сармоя Ҳисобот оид ба тағйирёбии сармоя шакли ҳисоботи муҳосибии молиявиест, ки ҳаракати сармояи оинномавӣ, сармояи иловагӣ ва ҳам тамоми тағйироти андозаи фоидаи тақсимнашуда (зарари талофинашуда)-и корхонаро нишон медиҳад. Ин нави ҳисоботи молиявии корхона аз ду қисми паси ҳам овардашуда иборат аст.