истеҳсолӣ нахустин амале ҳисоб меёфт, ки одамизод берун аз ҳудуди сайёраи худ анҷом додааст...

Ва он рӯз наздик мерасид. Ва ба истиқболи он лаҳза ҳама омода мешуданд...

Дар космодромҳои Сари Озек ва Невада охирин тадбирҳои тайёрӣ ба амалиёти гидротехникӣ дар Икс ба анҷом мерасиданд. «Паритет» ҳаракати худро дар мадори «Трамплин» идома медоду ба қабул ва гусели нахустин гурӯҳи коргарони кашшофи тамаддуни берун аз Замин омода буд.

Банӣ-одам зотан бар остонаи Қасри тамаддуни берун аз Замини худ расида буд.

Ана дар ҳамин лаҳза, дар арафаи сафари аввалин гурӯҳи гидрологҳо ба Икс ду нафар паритет-кайҳоннаварде, ки дар мадори «Трамплин» дар истгоҳи «Паритет» машғули поси дарозмуддати кайҳонӣ буданд, баногоҳ ғайб заданд...

Онҳо банохост посух доданро ба сигналҳо — чӣ дар вақти муайяншудаи алоқа ва чӣ дар соатҳои дигар — қатъ намуданд. Ҳама афсурдахотир (афсурдахотир) буданд, зеро ба ҷуз асбобҳое, ки мавқеи истгоҳро нишон медоданд ва ҳаракати онро дар мадор тасҳеҳ мекарданд, дигар ҳамаи аппаратҳои робитаи радиову телевизион аз кор монда буданд.

Фурсат мегузашт. Аз «Паритет» ҳамчунон ҷавобе набуд. Дар дили сокинони «Конвенция» изтироб меафзуд. Аз ҳар калла як садое мебаромад: ба сари паритет-кайҳоннавардон чӣ рӯзе омада бошад? Сабаби сукуташон чӣ бошад? Оё касал нашуда бошанд, ё хӯроки нобоберо хӯрда заҳролуд нашуда бошанд? Оё аслан зинда бошанд?

Ниҳоят василаи охиринро ба кор андохтанд — сигнале фиристоданд, то бонги хатари сӯхтор сар то сари истгоҳ ба садо дарояд. Аммо ба ин амри ваҳмангез ҳам ҷавобе наомад.

Барномаи «Демиург» бар хатари бузург дучор омада буд. Ва он гоҳ Мармутидор дар саҳни «Конвенция» барои муайян кардани вазъият охирин имкониятро ба кор андохт. Аз космодромҳои Невада ва Сари Озек барои васл шудан бар истгоҳ ду сафинаи кайҳонӣ бо ду кайҳоннавард роҳӣ гардиданд.

Киштиҳо ба истгоҳ расида, дар як вақт васл шуданд, ки зотан кори фавқулодда душворе буд ва нахустин пайгоме, ки аз кайҳоннавардони муфаттиши ба «Паритет»