ТАВОВИС

Ҷодари амир Исмоил

Амир Исмоил: Агар фардо ба лашкари Фарғона зарбаи муҳлик назанем, рӯҳияи сарбозонамон шикаста мешавад. Кӯшиш кунед, мунҳазим шудани лашкари амир Исҳоқ дар байни сарбозон овоза нашавад. Фардо ҷуброни ин шикаст бояд бароварда шавад, то ки ба сарбозон рӯҳияи боланда бахшад.

Субҳи рӯзи дигар сарбозони Амир Исмоил ба сӯйи Кармина ҳаракат мекунанд. Аз сӯйи дигар амир Наср бо лашкари хеш ба тарафи Тавосис ба роҳ мебароянд. Аз ду тараф садои дуҳул ва шайпур баланд мешавад. Ду лашкар ба ҷони ҳам меафтанд. Ҷанги сахте сурат мегирад. Лашкари Фарғона тоби муқовимат наёварда, ақибнишинӣ мекунад.

Амир Исмоил (Ба Ҳамӯя): Акнун навбати шумо расид. Саворанизомро ба майдон дароред. Лашкари Абулҳас то ба охир бояд торумор карда шавад. Онҳо набояд дигарбора барои ҷамъоварии сарбозонашон фурсат ёбанд...

Ҳамӯя бинни Алӣ бо саворанизоми хеш вориди набард мешавад. Лашкари Фарғона мунҳазим мешавад ва ба сӯйи Самарқанд қафо мешинад.

Шаб

Ҳусаини Аъло: Амир Наср ба Рабинҷон рафтааст, то ки кори лашкарро танзим намоянд.

Ҳамӯя бинни Алӣ: Мардуми Самарқанд бар Абулашъас шӯридаанд, ба сабаби бародарро дар майдони ҷанг танҳо гузоштан. Хостаанд, ӯро бигиранд, вале ӯ боз лашкар қавӣ карда ба тарафи мо меояд.

Амир Исмоил: Пас бояд ба зудӣ лашкарро ба тарафи Рабинҷон ҳаракат дод. Ин фурсати хубест. Аз лашкари Истаравшан чӣ хабар аст?

Ҳусаини Аъло: Онҳо ба Кармина фуруд омадаанд ва ба амир Наср пайвастаанд. Аз ин рӯ мо наметавонем ба ҷониби Рабинҷон ҳаракат кунем. Фардо низ дар ҳаволии Кармина даргири ҷанг хоҳем шуд.