Оре, мани гуреза зи сангу кӯҳ,
Иршоди сангсор шудан дорам.
августи 2004

ФАСЛИ ПИРӢ

Ҷониби боғи умри ман
Ҳай нафаси шито расид.
Мӯи чу сабзаи маро
Дасти хазони зард чид.

Фасли фаро шудан гузашт,
Фасли фурӯ фаро шуда.
Хонанишинакам дигар,
Хона аламсаро шуда.
Бурд саманди рӯзҳо
Ҳусни ман аз бисоти ман.
Пайкари ёсамин ку?
Пайкари беҳаёти ман.

Аз чӣ касе гирифтаӣ
Ному суроғаи маро?
Рост вале бигӯ фақат
Мавсими омада фаро!
январи 2005

МАШАВ ТУ ПИР ДИГАР

Салом, эй, ки азизӣ зи ҳар азизи дигар,
Салом, эй, ки зи ҳаркӣ бануртар ҳастӣ,
Салом, эй зи ҳама аввалу муқаддастар,
Салом, эй модар!

Салом!
Ман ба саломи ту ҳар саҳар оям,
Ва ҳар саҳар ба хаёлу ғами дигар оям,
Ту пир мешавию ваҳми ман зиёда шавад,
Ту пир мешавию ман зиёдтар оям,
Машав ту пир дигар.

Машав ту пир, ки дилгиру хастаҷон гардам,
Заифу оҷизу пажмурдаву хазон гардам.
Агарчӣ номнависам ҳамекунад пирӣ,
Агарчӣ умри ман аз пушти умри туст равон,
Машав ту пир, ай ҷон,
Ки ман зи пирии ту пир мешавам, модар,
Машав ту пир дигар,
Машав ту пир дигар!
феврали 2002

БАҲОРИ ТОЗАҚИЁМ

Оҳ, Раънои қадим,
Аз дигар ҳарза магӯ,
Ҳарзагӯии ту бас.
Мон, ки ман ҳам сухане оғозам,
Сар кунам эъҷозам,
Сар диҳам овозам.
Бас дигар абр шуданҳо
Ба раҳи парвозам!

Эй ту, эй омада аз асри куҳан,
Бо куҳан хислату бо кӯҳна сухан.