Ноҷӯрам кард, гарчи машҳурам кард.
Ин ҷо манаму ҳамешагӣ ёди ҳазин,
Ёди пури ҳузн сахт ранҷурам кард.

Дурӣ зи насаб аҷаб гарон аст, эй бод,
Бо сад чаманаш ба ман хазон аст, эй бод.
Пайвастаи сад касу ҳазорон нокас,
Вобастаи бадтарин ғамон аст, эй бод.

Эй бод, ки панҷа мезанӣ бар дари ман,
Пайғом магар биёрӣ аз модари ман?
Дар мавҷи ту савти пасти «Даргилик» аст,
Сӯзондияму бибар ту хокистари ман.
июли 2003
ПУШАЙМОНӢ

Санге бигиру бар сари ман бишкан,
Санге зи сангҳои кӯҳистонам.
Ки рафтаам ба ҷониби шаҳристон,
Дунболи орзуяму армонам.

Санге бигиру бар сари ман бишкан,
Ки лоиқам дигар ба ҷазое сахт.
Войи мани гурехта аз тақдир,
Аз зодгоҳи хеш бичида рахт.

Ғофил аз он, ки тахти ману бахтам,
Санги сабури мулки кӯҳистон аст.
Ғофил аз он, ки шеъри музофотӣ
Ҳамрози рову чукриву торон аст.

Санге бигиру бар сари ман бишкан,
Ки умр рафту зор шудан дорам.