Эй зи фурўғ мурдаву мурда кашида бо дурўғ,
Мурдаи ту намешавад пилтачароғи як фурўғ.

---

Ақлам заду дил, ҷигар кашидам,
Ғоратшудагон чӣ тўҳфа оранд?!

---

Бин, ки бесўён чи тансў медаванд,
Аз ҳама сўҳо даҳансў медаванд.

---

Хуни имрўз дар соҳати Иттифоқ рехта Дар набзи Замин ба ҳайрат садо мезанад:
– Гўё 70 сол на иттифоқи инсонҳо, Иттифоқи шайтонҳо буда.

---

Ҷосуси худу ғуломи ҷосуси касон,
Бифрўхт Ватан ба дуллару бўси касон.

---

Ту лаб бар гап кушо ман бўса бар лаб
Чу лаб бар лаб расад дунё шавад хап.

---

Ангушти ҳайрат мегазам чун гул сари гулзорҳо
Ангушти хунини Худо дар чанги мушти хорҳо.

---

Биҳишти ишқ дар дилҳо кушоданд,
Калидаш бўсаи лабҳо ниҳоданд.

---

Дўш ба дўш мебаранд фалсафаҳои мурдаро,
Ишқ куҷо шунида буд мурдаи зиндахўрдаро.

---

Лабаш хандид чун чоки гиребон,
Забон дил зад, ки урёнтар зи оҳам.

---

Ҳангомаам ба хок на ҳамгомаи ман аст,
Ободии Замин ба фалак номаи ман аст.

---

Ҷавоне ба чанор мегуфт:
– Хулосаи замин туйӣ Хулосаи таърих манам.
Духтаре ба гул мегуфт:
– Хулосаи зебойӣ туйӣ, Хулосаи ишқ манам.
Нур ба борон гуфт:
Хулосаҳоро бирўён, Ки бўйи пажмурдан надиҳад.

---

Ману авбош бародарем
Ва ҳарду урёнгарем:
Ман дунёро пеши ақл урён мекунам,
Ў ақлро пеши дунё.
Ба якрўӣ ҳар ду ғалатварем…

---

Замин яке китобхонаи ишқ аст,
Дар китобхона сўҳбат ба чашму абрў беҳ.

---