Онҳо, ки худобозанд, бо номи Худо созанд,
Онҳо, ки Худоёранд аз илму ҳунар нозанд.

---

Ғайри ман дунё набуду ғайри ман дине набуд,
Ҳарчӣ аз берун дарун бурдам дурўғу кина буд.

---

Олам, ки ҳама ба гуфтугў гарм тапид,
Фаҳмидани ҳам ба хотири кас нарасид.

---

Олам ҳама варзиши дурўғ омўзад,
Бошад, ки фитад ба боғи фирдавси дурўғ.

---

Дар фалак оворатар аз ман Замин,
Гўиё ҷон омадам ман, тан –Замин.

---

Ин Худокушҳо, ки манро куштаанд,
Пеш аз ман хештанро куштаанд.

---

Аз хокзанӣ задем дар хок,
Мондем зи хешу хоку афлок.

---

Тарсат зи дарун рўйи фалак зод Худо,
Тарсат зи бурун зод Худо аз авбош.

---

Бишўӣ ҳар қадар ғаждии кина,
Муҳаббат он қадар ҷўшад ба сина.

---

То панаҳ ёбад ба чашми гову баргу обу кўҳ,
Дўш ирфон аз нигоҳи ман гурезон шуд чу нур.

---

Поктарин шоҳи ҷаҳон аст тифл,
Гиряи ў ҳукми ҳаёти замин.

---

Ҳар субҳ офтоб диҳад ханда ёду ман,
Бе хандаҳои чашми шабат бесаводи ханд.

---

Гурбае бо силае аз синаам пай бурду лек,
Дар канорам хуфтаӣ умре, набурда пай дилам.

---

Фиғони мард аз занҳои сард аст,
Зани сард аз куҷо зан, сарддард аст.

---

Ба вақти гирифтан даҳан аждаҳоӣ,
Ба ҳангоми додан кафе мўрпоӣ.

---

Олам ҳама пур зи нур, аммо,
Ку чашм, ки бинаду шиносад.

---

Нуре, ки ба сўи ту давад рост, сафед аст,
Нуре, ки гузар каҷ кунад аз чашм, сиёҳ аст.

---

Донӣ ту, ки ман рост ба сўйи ту равонам,
Бар чашми паямбар сияҳам гарчи, савоб аст.

---