ДАРЁФТ

Ишқи худро оқибат дарёфтам
Чун умед аз ноумедии ҷаҳон.
Ишқ дар боғи дилам пажмурда буд,
Руст аз доғи дилам ӯ ногаҳон.

Ишқи худро оқибат дарёфтам
Аз роҳи тақдир чун ангуштарин.
Ӯ магар афтода аз ангушти моҳ
Дар роҳи бахти ман аз чархи барин?

Ишқи худро оқибат дарёфтам
Бебаҳо чун гавҳар аз дарёи дил.
Оҳ, ӯ ашки арӯсии ман аст,
Рехта дар домани дунёи дил.

Ишқи худро оқибат дарёфтам
Бар сарам чун осмони беканор.
Дидамаш чун ахтари раҳшони худ
Раҳнамоям сӯи рӯз аз шоми тор.

Ишқи худро оқибат дарёфтам
Аз роҳи пурпечу тоби зиндагӣ.
Дар дилу дар дидагони ман дамид
Рӯшании офтоби зиндагӣ.