Гандум ба обёрӣ эҳтиёҷи калон дорад. Ин аст, ки аз заминҳои обӣ ду ҳосили фаровон гирифта мешавад. Дар ҳолатҳои хушк будани хок 6-8 рўз пеш аз кишти гандум обмонии захиравӣ бо меъёри 1000-1200 м3/га гузаронида мешавад. Дар қитъаҳои барои тухмӣ ҷудо карда шуда хишоваи навъӣ мегузаронанд.
ҒУНУЧИНИ ҲОСИЛ. Дар муҳлатҳои аниқ бо техникаи нағзтанзимшуда ғунучин кардани ҳосил яке аз шартҳои асосии гирифтани ҳосили баланду ҳушсифат буда, боиси кам талафшавии дон мегардад. Барои ба даст даровардани миқдори аниқи дон пеш аз ғундоштани ҳосил сифати онро дар қитъаҳо муайян кардан зарур аст. Дер бардоштани ҳосил натанҳо сабаби камшавӣ, балки паст гаштани сифати молӣ (шаффофӣ ва ранг) ва нархи он мегардад. Дар ҳолати 10-15 рўз дер ғундоштани ҳосил талафоти дон то 12-15%-ро ташкил дода, миқдори донаҳои захмдоршуда меафзояд, ки онҳоро минбаъд чун тухмӣ истифода бурдан имконнопазир мегардад.
Дар шароити Тоҷикистон ҳосили гандумро дар давраи пурра пухта расидани дон бо усули дарави яклухт меғундоранд. Бо усули дарави ҷудогона ҳосили гандум дар давраӣ (фазаи) думбул будани дон чамъоварӣ мешавад. Дар шароитҳои вилояти Суғд ва ноҳияҳои водии Ҳисор то 35 июн ва дар водии Вахш то 20 июн ғунучини ҳосили гандуми тирамоҳиро ба итмом расонидан ба мақсад мувофиқ аст.
Ҳосил ба воситаи комбайоҳои ғалладарави СК-5М «Нива», СКД-5, «Сибиряк», СК-6 ва ғ. ғундошта мешавад. Пас аз ғундоштани ҳосил дарҳол пояҳои гандумро исканҷа (пресс) карда, дар ҷойҳои) махсус захира мекунанд. Заминҳои оби барои кишти зироатҳои ангорӣ (пожнивные) тайёр карда мешаванд.