МАДРАСАИ АБДУЛЛОҲХОН

Маҷмааи меъморӣ дар маҳаллаи Навгилеми шаҳри Исфара. Бинои мадраса аз масҷид ва манори 22,5-метра иборат аст. Он дар охири асри XVI аз ҷониби хони Бухоро Абдуллоҳхони II сохта шудааст. Соли 1999 таъмир гардидааст.

МАДРАСАИ ОЙИМ

Дар охирҳои асри XVI ва аввалҳои асри XVII дар шаҳри Конибодом шабеҳи Мадрасаи Мирраҷаб Додхоҳ сохта шудааст. Шакли он чоркунҷа буда, ҳуҷраҳо ва айвон дорад. Ду бинои гунбаздораш дорои миёнсаро буда, яке аз онҳо масҷид аст. Дар шифти мадраса равзанаи шашкунҷа гузоштаанд. Дохили мадраса гаҷкорӣ шудааст.

МАДРАСАИ МИРОЛИМ ДОДХОҲ

Дар асри XVIII дар қисми ҷанубу шарқии шаҳри Панҷакент сохта шудааст. Он аз толори гунбаздори бузург иборат буда, дар се тарафаш айвонҳои гунбаздори аркӣ мавҷуданд. Дар наздикии мадраса манораи начандон бузург, ҳавз, 12 ҳуҷра воқеъ буд. Биноҳои мадраса ва масҷиди назди он борҳо таъмиру тармим шудаанд.