• Намедиҳам, камона ҳуҷҷат соз карда гирифтаам. Ягон балоро сар мебарӣ. Зану кӯдак дорам...

• Тарсончак! Туро ба ин дилу гурда кӣ нигаҳбон таъйин кард-а?.. Ҳеъ, зихнаи... - Сайиди Барот лаҷоми аспро басинтеза мегардонд, ки Абдурауф ӯро аз роҳ боздошта гуфт:

• Наранҷе, камона бигиру зуд биёр-а! - яроқро дудила ба ошнояш супорида, бар бари асп қадам партофт. - Ҳе, чашмҳот бечо, рост бигӯ, ягон бегуноҳа напарронӣ?..

• Мепарронам, ҳа, мепар-ро-на-ам! - подабон туфангро аз дасти дӯсташ ҷангида, самандашро чорхез давонд.

• Ҳе-е, киро мепарронӣ-й?! Би-й-и-ист, кӯдакома сагера накун! Ҳе е-е-е-ей...!

Асп аз чашмҳо ғоиб шуд. Гурс-гурс давидани он аз пайроҳаи кӯҳӣ меомад. Абдурауф худро сарзаниш мекард, ки дар маҳбас менишинад, солҳо рӯи озодиро намебинад. Хоҳ ин подаи зормонда паҳлӯи гандумзор намечарид, асп метозонд аз пасаш, мефаҳмид асрори бударо.

Баҳори кӯҳистон рӯҳафзост. Гулҳои зардаку сафедгӯш басо зебо мешукуфад. Лолазор. Бозишон медоронд боди нолон. Лолаҳои синаҷок бо раддаи майсаи гандум ҷумбиш мехӯрд. Доғи лолаҳоро на бод медонист, на гандум. Гӯё дар гандумзор як рӯде ҷорист тарқаи хун. Боди нолагар лолаҳоро мебӯсид. Ғамзадаҳои синаҷок. Фохтаҳои донаҷӯ лолаҳоро бор андохта, қоматшон мешикастанд. Ба аламзада ғам болои ғам меомадааст.

Сайиди Барот аспакӣ ба паси кӯҳ гузашт. Аз он ҷо қулла намоён буд. Мӯйсафед аз асп фуромада, ҷонварро дар гӯшае тавила кард ва аз параи рӯяш бӯсид, ки фирриҳос назанад, шиҳа накашад, орами ором бошад. Сари по оҳистаҳак ба каторвазна тир ҷо карду баэҳтиёт так-таки дара рафт, лонаи уқобро кофт. Дуздона раҳ мегашт, ки шарфае барнахезад. Ба ҷуз қуллай бовиқор нишоне натобид. «Куҷо гум шуд, уқоби ҳаромхӯр?» - пурсид аз туфанги думилла. Ба канортари дара назар андохт. Пирамарди дарсинтез сар-сари шахҳоро ба нигоҳ мепалмосӣ. Ва дид, ки як бол боло шуду пойин. Ду бол ба дид омад. Дарёфт душманеро, ки меҷӯсташ. Нигаҳаш дар танаи шах-рӯи гирдсанг часпид. Ана, лонаи уқоб! Драхтсагро ҳафакуш дорад. Дарҳол дузону нишаст ва мили туфангро сӯйи шах гардонда, зери лаб шумурд: «як, ду-у, се!» Садои