• Ҳа, чӣ хеле ки шумо супориш дода будед.
• Баъди он ҳодиса вай лаънатиро дидед?
• Не.
• Вайро боз каме афшонидан лозим!
• Чӣ хел?
• Сабти овози вай дар дастат ҳаст?
• Ҳа, ман онро дар асоси амри шумо пинҳон намудам.
• Телефони шуморо бошад, ман дирўз барои таъмир ба усто дода будам, акнун он дар дасти ман аст.
• Телефони шумо бошад, дар архиви ман маҳфуз аст, - хандида гуфт нафаре, ки бо Дороб Қамар дар алоқа буд.
• Ҳа, акнун он сабт сабти таърихист.
• Мефаҳмам.
• Барои ҳамин аз телефон - автомати кӯча бо ӯ дар тамос шуда, ба вохўрӣ таклифаш намоед ва гўед, ки бе фикри он пулҳои гумшуда набошад.
• Рафту эътироз намояд чӣ?
• Ба вай фаҳмон: он пул барои он лозим аст, ки нафари дар хизматаш буда, аз кишвар баромада равад, дар акси ҳол...
• Дар акси ҳол чӣ?
• Ҳаминашро гўй басанда аст, вай худаш мефаҳмад...
• Ҳамааш ҳамин?
• Ҳамин. Ҳа, дарвоқеъ, ба вай фаҳмон, ки як маротиба бо банда низ алоқа барқарор намояд. Аз кадом телефон вай худаш мефаҳмад.
• Чун артист (Ҳусейн Акбар дар назар аст) биёяд ба вай чӣ гўям?
• Гўй, ки ба умеди мўйсари сунъӣ ва мўйлаб нашаваду худро эҳтиёт намояд.
• Агар зарурияте пайдо шуд, ман метавонам занг занам?
• Албатта.
• Дар амони Худо бошед.
• Худо ҳофиз, - гўён Дороб Қамар ба алоқа нуқта гузошт ва тағйири либос намуда, ба ошхона рафт...

---

Баъди ним соат гуфтугўи телефонии абоненти рақами 918-26-54... бо абоненти рақами 95-162-38... болои мизи кории Ҳамид Ҷовид гузошта шуд. Матни гуфтугўро бо талаби хаттии сарвари ШКД - и ноҳияи Сарчашма полковники милиса Ҳамид Ҷовид кормандони Раёсати ҳафтуми ВКД ҶТ ба даст оварда, бо ҳамин ба қавле хизмати хешро дар мубориза алайҳи ҷинояткорӣ ба сомон расонданд.