1.2. Бармакиён дар Бағдод

Намояндаи дигари машҳури халқи тоҷик Холиди Бармакӣ, маъруфтарин аз вазирони тоҷиктабори хилофати Аббосиён мебошад, ки аз миёни лашкари хуросонии Абумуслим ба майдон омада буд.
Агар аввалин намояндаи барҷастаи халқи тоҷик Абумуслим дар тағйир додани сулолаи ҳукмрони хилофати араб ва ислом бо силоҳ дар даст нақши ҳалкунанда дошта ва бо ин васила заминаи иҷтимоӣ ва қавмии пайравони дини исломро васеъ карда бошад, пас Холиди Бармакӣ рисолати худро ҳамчун асосгузори воқеии маъмурияти давлатӣ дар сулолаи Аббосиён тавассути пурзӯр намудани девони вазирони халифа ва бунёди пойтахти нав идома дод. Ӯ инчунин дар таъсиси маъмурияти коршоями вилоятҳои гуногуни империяи (хилофати) васеъгардидаистода низ ҳиссаи бузург гузошт.
Холид писари Бармак, саркоҳини маъбади буддоии Навбаҳори назди Балх ва яке аз маликаҳои ҳокими Чағониён (минтақаи таърихӣ дар марзи муосири ҷануби Тоҷикистон ва Ӯзбекистон. – М.А.) буд. Чун хабар дода мешавад, ки «ӯ бо халифа чунон наздикӣ дошт, ки (халифа Абулаббос, с. 749-754- M. A.), духтари Холид аз ҳамсари халифа шир макида ва духтари халифа ҳамсари Холид буд. Аз соли 132 (ҳиҷрӣ) /с.749-750, ӯ дар сари девони хироҷ меистод. Дар баъзе маъхазҳо ӯро вазир низ меноманд. Холид, шояд, ки якумин «котиб» буд, ки дар ин мақом аз рӯйи ин рутба ба вазир баробар буд».