2660 Набояд, ки ояд бар ў-бар газанд,
Зи ман бинад ин паҳлавони баланд.

Чу бишнид Пирон, бихандиду гуфт:
«Намонад нажоду ҳунар дар нуҳуфт».

Нишаст аз бари бораи дасткаш,
Биёмад бари шери хуршедфаш,

Ҳамон гаҳ баромад бари ў ҷавон,
Нигаҳ кард болои ў паҳлавон.

Равон гашт шаҳзода монанди бод,
Биёмад давон, дасти ў бўса дод.

2665 Чу Пирон бидид ончунон фарру чеҳр,
Рухаш гашт пуробу дил пур зи меҳр.

Ба бар даргирифташ замоне дароз,
Ҳаме гуфт бо довари пок роз.

Бад-ў гуфт Хусрав, ки «Эй покдин,
Ба ту бод рахшанда Туронзамин.

Азеро касе к-ат бидонад ҳаме
Ба ҷуз меҳрубонат нахонад ҳаме.

Шубонзодаеро чунон дар канор
Бигириву аз кас наёяд-т ор».

2670 Хирадмандро дил бар ў - бар бисўхт,
Ба кирдори оташ рухаш барфурўхт.

Бад-ў гуфт, к-«Эй ёдгори меҳон,
Писандидаву носипарда ҷаҳон,

Шубон нест аз гавҳари ту касе
В-аз ин достон аст бо ман басе».

Зи баҳри ҷавон аспи тозӣ бихост,
Ҳамон ҷомаи хусравӣ кард рост.

Ба айвон хиромид бо ў ба ҳам,
Равонаш зи баҳри Сиёвуш дижам.

2675 Ҳаме парваронидаш андар канор,
Бад-ў шодмон буду беҳрўзгор.

Аз ў дур шуд хўрду орому хоб,
Зи меҳри ваю хашми Афросиёб.

Бад-ин низ бугзашт чанде сипеҳр,
Ба дил-дар ҳаме дошт оромумеҳр.