ЗӮРТАР АЗ БӮҲРОН

Ба як хавоси парешон баҳор омаду рафт,
Пур аз ҳаводису тӯфон баҳор омаду рафт.
На сабзияш ба дилам сабт шуд, на як савташ,
Хунук чу фасли зимистон баҳор омаду рафт.

Чаҳор фасл ҳама якмарому якранганд
Дар ин замона, ки пур аз навои бӯҳронист.
Агарчӣ ҳаст ба тақвим фасли тобистон,
Вале, дугона, ҳамоно ҳавои бӯҳронист.

Миёни ин ҳама берангҳо карахтам ман,
На одаме, ҳамагӣ безабон дарахтам ман.
Агарчӣ лек карахтам, агарчӣ лек дарахт,
Зи бодҳо нафитам, чунки сахти сахтам ман!
январи 1997

ЁРИ МУҲОҶИР

Дар фасли барфу баҳман
Ёрам, чӣ ҳол дорӣ?
Дар он канори дунё
Ёре ҳалол дорӣ?

Бӯҳрону тангдастӣ
Бурду муҳоҷират кард.
Ҳамроҳи бахши аъзам
Марди мусофират кард.
Эй мардикори ночор,
Эй хор, хор, эй хор,
Эй аз таҳаввули рӯз
Бишкаставу шуда зор.

Кай мешавад паси сар
Мӯҳтоҷиву гадоӣ?
Кай мерасем, эй вой,
То сатҳи худкифоӣ.

Чун фасли гарм он ҷо
Ҳоли завол дорӣ.
Пас фасли барфу баҳман,
Ёрам, чӣ ҳол дорӣ?!
феврали 2005

ПИРДУХТАР

Навбаҳор, эй навбаҳор,
Ин сафар борам биёр,
Як нафар ёрам биёр,
Марди ғамхорам биёр,
Лутф мехоҳад дилам,
Лутфи бисёрам биёр.

Чил баҳор аз сар шуду
Ин сарам бе сарвар аст,
Ин дилам бе дилбар аст,
Шоми ман бе ахтар аст,
Исму ҷисми поки ман
То кунун каснохар аст.